Premi Terzani 2016

La fame, il reportage dal gjornalist e scritôr argjentin Martin Caparrós – publicât in Italie di Einaudi – al vinç la edizion 2016 dal Premi Leterari internazionâl Tiziano Terzani. Lu à anunziât a Rome cheste matine – miercus ai 20 di Avrîl – la presidente de Jurie Angela Terzani cu la presidente de Regjon autonome Friûl Vignesie Julie Debora Serracchiani e i rapresentants de associazion culturâl vicino/lontano di Udin che intal 2005, in colaborazion cu la famee Terzani, e à istituît il Premi.

Cuasi un miliart di personis intal mont a sofrissin la fam. Ogni an nûf milions di oms a muerin par denutrizion. «L’autôr – e sclarìs – no si è fermât devant dai numars che a segnalin lis percentuâls de fam intal mont, insuficients inte lôr ariditât par sgrifâ la nestre indiference. Cemût che al varès fat il stes Tiziano, si è metût in viaç, passant i teritoris de puaretât estreme e lant jù intal infier des tantis, masse perifariis dal planet. Al è jentrât intes vitis des singulis personis, lis à interogadis e scoltadis cu la pietas di cui che si sint clamât in cause in maniere direte, ma ancje cu la luciditât di un pinsîr laic che nol fâs sconts a nissun, e soredut cul cûr e la passion di cui che al vûl individuâ, smascarâ e denunziâ i mecanisims e i interès che a stan daûr un scandul che si volarès fâ passâ tant che un fenomen inevitabil. Ae fin di une leture fisse che no lasse tregue, in graciis di une agjilitât straordenarie di scriture buine di rindi apassionant un teme cussì dûr, cussì discomut, nissun al pues fâ fente di nuie, nissun di nô al pues voltâsi di chê altre bande. E e reste la voie di savê di plui. Par cheste denunzie, par cheste luciditât, par chest riclam ae nestre responsabilitât, individuâl e coletive – e marcje ancjemò Angela Terzani – e soredut pe utopie che ae fin l’autôr nus consegne di une rivoluzion antropologjiche pussibile buine di ribaltâ il paradigme des “necessariis” disparitâts, la Jurie e assegne il Premi Leterari internazionâl Tiziano Terzani 2016 a La fam di Martin Caparrós».

Martín Caparrós al sarà premiât sabide ai 7 di Mai al Teatri Nuovo Giovanni da Udine (aes  20.45), cuntun event che al sarà come simpri intal cûr dal Festival vicino/lontano, chest an ae sô XII edizion, in program a Udin dal 5 ai 8 di Mai. Dilunc de serade dedicade al Premi, e sarà la scritore e gjornaliste Loredana Lipperini, tra lis vôs plui preseadis di Fahrenheit, la trasmission leterarie di Rai3, a intervistâ il vincidôr 2016 dal Terzani. La Jurie che e à assegnât il ricognossiment cussì prestigjôs e je componude di Giulio Anselmi, Enza Campino, Toni Capuozzo, Tommaso Cerno, Andrea Filippi, Álen Loreti, Milena Gabanelli, Ettore Mo, Carla Nicolini, Paolo Pecile, Valerio Pellizzari, Peter Popham, Marino Sinibaldi. Info www.vicinolontano.it

«Di plui di un deceni – e à comentât la Presidente de Regjon Friûl Vignesie Julie Debora Serracchiani – il premi Terzani nus permet di jentrâ intai temis cruciâi che a passin fûr par fûr la societât e la umanitât, fasint di Udin e dal Friûl Vignesie Julie un lûc favorît di dialetiche, dulà che lis inteligjencis si incrosin par produsi gnove cognossince. Ancje il teme di chest an – la vulnerabilitât – al è di alte solecitazion: par chest o crôt che il premi assegnât al reportage La fam dal argjentin Caparrós al sarà un riclam fuart ae nestre responsabilitât. Scoltâ la sô testemoneance e sarà di ciert une scjassade, une clamade ae cussience di ognidun».

«O vin preseât une vore la sielte de Jurie – a disin i organizadôrs – parcè che Martín Caparrós, intal denunziâ il nestri benstâ di privilegjâts dal Prin Mont e la nestre atitudin ae straçarie, al mostre i disecuilibris intolerabii dal planet, dimostrant che “no esist la ricjece di un Paîs cence la miserie e la fam di un altri”. La fam e devente cussì une lint necessarie che traviers chê Caparrós nus oblee a cjalâ il mont là che o vivìn e sot chê lint a passin in rassegne i temis cruciâi de postmodernitât: lis frenetichis, cressintis disparitâts dal mont globalizât, la rapine dai teritoris, la distruzion e il control di risorsis, lis gnovis formis di colonialisim e di sfrutament sclavist, lis antighis e gnovis formis di esclusion, in particolâr des feminis, la inadeguatece colpevule dai guviers e la impotence de solidarietât internazionâl. A son i temis, adun cun altris, che a componin i senaris dal mont contemporani, che su chei il festival vicino/lontano di simpri si interoghe, intal non di Tiziano Terzani».

Martin Caparrós al jere jentrât inte cincuine finaliste dal Premi Terzani 2016 cun Jonathan Crary par 24/7 Il capitalismo all’assalto del sonno (Einaudi), Kamel Daoud par Il caso Meursault (Bompiani); Alessandro Leogrande par La frontiera (Feltrinelli) e Lawrence Wright par La prigione della fede (Adelphi).

Intes edizions passadis il Premi al è stât assegnât a: François Bizot, 2005; Jonathan Randal, 2006; Anna Politkovskaja (ae memorie), 2007; Fabrizio Gatti, 2008; Ahmed Rashid, 2009; Umberto Ambrosoli, 2010; Leslie T. Chang, 2011; ‘Ala al-Aswani, 2012; George Soros 2013; Mohsin Hamid e Pierluigi Cappello (ex aequo) 2014; David Van Reybrouck, 2015.

Gjornalist e scritôr argjentin nassût a Buenos Aires intal 1957, Martin Caparrós al è stât atîf inte stampe clandestine dilunc de ditature militâr (1976-1983), al à vivût in esili prime a Parîs, dulà che si è laureât in storie ae Sorbona, dopo a Madrid, dulà che al à colaborât a El País, e a New York. Tornât in patrie dopo la restaurazion de democrazie, al à lavorât par testadis gjornalistichis, radiofonichis e televisivis, continuant in ogni câs a viazâ in mieç mont par puartâ indevant lis sôs inchiestis. Al à direzût rivistis di libris e di cusine, al à tradot Voltaire, Shakespeare e Quevedo, vincint tancj premis internazionâi. Al è autôr di une trentine di libris tra romançs e saçs. In Italie a son stâts publicâts: Il ladro del sorriso (Ponte alle Grazie 2006); Non è un cambio di stagione. Un iperviaggio nell’apocalisse climatica (Edizioni Ambiente 2011); La fame (Einaudi 2015), vincidôr del Premi Terzani 2016.

Traduzion par cure de ARLeF
ARLeF