Premi Terzani 2018

Succede ad Aleppo, l’afresc intens su la vuere civîl in Sirie firmât dal inviât de La Stampa Domenico Quirico – publicât in Italie di Laterza – al vinç la XIV edizion dal Premi Leterari Internazionâl Tiziano Terzani. Al sarà premiât sabide ai 12 di Mai tal Teatri Gnûf Giovanni da Udine (aes 21) dilunc di une serade event, di simpri il moment plui spietât dal Festival vicino/lontano che, intal 2005, in colaborazion cu la famee Terzani, al à istituît il Premi.

«Un mont ocidentâl distrat, passîf, par agns al à cjalât cence viodi i muarts e i rudinaçs sirians – e dîs Angela Terzani, presidente de Jurie -. Domenico Quirico, cronist in chel paîs, si è inacuart invezit che “la alchimie des sôs peraulis” no rivave plui a trasmeti chel caos barbar e impunît. Intes pagjinis di Succede ad Aleppo al met di bande i tiermins enfatics, dirompents, che intes storiis di vuere par tradizion al pâr che a vuelin competi cul rumôr des bombis e cul colôr dal sanc. Cundut des lungjis esperiencis dal autôr intes perifariis disperadis dal mont, chest libri al passe fûr par un itinerari fadiôs, inesplorât. Par cheste scriture eretiche devant dal maçalizi sirian e de indiference de opinion publiche, la jurie e assegne a Succede ad Aleppo il premi Terzani 2018».

E Domenico Quirico al à declarât: «Vuê scrivi – di Aleppo, di Sirie, di vueris, di migrazion, di dispatriâts – al è un at obligatori. Cuintri il cidinôr: opac, atroç, inuman. E je la lezion di Tiziano Terzani. Sui gjornâi, fin che a esistaran, intai libris, cu lis imagjins, cu lis peraulis: cjalâ, scoltâ imbombâsi de violence dal mont e scrivi. Scrivi par disfâsi dai prejudizis, de ilusion di vê capît za dut, de pôre».

Te serade dal Premi Terzani e intervignarà ancje Emel Mathlouthi, la artiste tunisine deventade icone de Primevere arabe: a Udin e rivocarà cussì la vôs che e à segnât in musiche la “Rivoluzion dai zessalmins”. Il Premi Terzani 2018 al ufrirà une ocasion straordenarie par cjatâ e par cognossi la celebre artiste: la sô Kelmti horra (My Word is Free) e je deventade l’imni de place tunisine e Emel e je stade invidade ancje a cjantâle a Oslo, intal 2015, in ocasion de consegne dal premi Nobel pe pâs aes cuatri organizazions de societât civîl tunisine che a àn operât a pro de svolte democratiche dal Paîs. Intal so cjant di libertât al rimbombarà in maniere ideâl il spirt pacifist di chel Tiziano Terzani che al à scrit Lettere contro la guerra e che o vin cjatât esprimût ancje intes pagjinis di tancj dai autôrs che intal so non a son stâts premiâts a Udin.

Domenico Quirico, gjornalist e inviât, des pagjinis de La Stampa al à contât lis vicendis de Afriche e dal mont arap dai ultins vincj agns. Al à passât il Mediterani suntune barcje di migrants, al è stât secuestrât dai soldâts di Gheddafi in Libie intal 2011 e dai jihadiscj sirians intal 2013. Tra ducj i siei libris, chei plui resints a son leâts ae sô esperience di gjornalisim di presince. Cun Neri Pozza al à publicât: Il paese del male. 152 giorni in ostaggio in Siria; Il Grande Califfato; Esodo. Storia del nuovo millennio (finalist dal Premi Terzani, edizion 2017) e Ombre dal fondo (cun P. Piacenza). Cun Laterza al à publicât tal 2017 Succede ad Aleppo.
calt-logo