Decime tierce edizion

Il sisteme di valôrs e l’ordin dal mont che o sin solits meti dongje ae idee di “Ocident” a àn vuidât la storie moderne e contemporanie: un progjet di civiltât fondât su la democrazie di citadins compagns e libars. O vin crodût che chest model al fos une concuiste stabile e universâl.

Une sorte di euforie coletive nus à impedît di ricognossi i cambiaments profonts e incontrolâts dal mont globalizât, deventât incomprensibil ae plui part de int e duncje insigûr e ostîl. Di bot si acuarzìn che la globalizazion, che e jentre tes nestris vitis cun efiets che no vevin previodût, e à metût in crisi ancje il sisteme gjenerâl. E cumò la avualance di fat e lis libertâts concretis a son ridimensionais dapardut, metudis ae prove di fuarcis disgregadoris internis e di menacis esternis.

Di dulà tornâ a scomençâ?

Pûr mantignint salde la sô carateristiche di fonts e la sô vocazion iniziâl – l’ancorament fuart ai problemis e ai temis dal nestri timp – vicino/lontano al à sielt la utopie tant che fîl condutôr de edizion 2017 e chest an al vûl provocâ la imagjinazion di ducj cuntune domande decisive. Sino bogns di pensâ il futûr tant che diviers dal presint?

Se no si fâs coincidi il realisim cu la rassegnazion – o cul pessimisim – forsit al è ancjemò pussibil un futûr che al torni a vierzi la storie, diliberantnus de paralisi des nestris pôris par trasformânus in protagoniscj responsabii, impegnâts tal  costruî une societât globâl des diferencis e de inclusion.

Ancje Sorj Chalandon, vincidôr dal Premi Terzani 2017 cu La quarta parete, in pagjinis di impat leterari e emotîf potent, nus consegne un messaç fuart e disperât, che te sô atualitât impressionante al sune tant che un amoniment cuintri la passivitât e la indiference devant dai orôrs des vueris e dal fanatisim fratricide che ogni dì o viodìn, protets de nestre “cuarte parêt” televisive.

Traduzion par cure de ARLeF
ARLeF