Festival 2016

O assistìn in direte, simpri plui spaurîts, ai maçalizis teroristics intai lûcs simbul de nestre laicitât, dulà che si misturin ints, marcjanziis, ideis sot dal cosmopolitisim contemporani.
O osservìn cun sconciert il scandul di une emergjence migratorie cjamade di tragjediis, che la Europe, aromai dividude su dut e simpri mancul popolâr, nol je in stât di fâi front cun misuris umanitariis ae altece de sô culture democratiche.
Lis istituzions che si sin dâts par garantî la convivence si mostrin fragjilis e inadatis. Fragjii a son i ecuilibris economics finanziaris de globalizazion, orchestrâts di interès che a van di là di nô. Framentât e confondût il cuadri gjeopolitic. Vulnerabil il teritori.
Ofindude la “veretât” che ducj o cognossìn,  ma “no vin lis provis”.
Intune realtât sometude a savoltaments profonts, o sin disorientâts. E si sintìn vulnerabii: se o sin feminis, adolessents cence ponts di riferiment, zovins e adults cence lavôr, se o sin puars o impuarîts, anzians, disabii, “diviers”…. bessôi.
Vulnerabilitât e je la cifre dal nestri timp.
Cjapâ cussience di chest e je la maniere par stâ tal mont – in chest mont – cence afidâ ae pôre il control dai nestris pinsîrs, ma frontant intal confront cun chei altris i problemis che o crodìn nestris e che a son di ducj: un mût par combati la crisi di fiducie tal futûr, pûr continuant a coltivâ dubis e a fâ domandis.

Program

Traduzion par cure de ARLeF
ARLeF